انہدامی کارروائی روکنے کیلئے مولانا ارشد مدنی کادہلی کے لیفٹیننٹ گورنر سے رابطہ

نئی دہلی: جیت پورعلاقہ میں لوگوں کی گاڑھی کمائی سے بنائے گئے آشیانہ حکومت کے بلڈوزرکے نشانہ پر ہیں۔ آج بھی اس علاقہ میں کئی مکانوںکو زمین دوز کردیا گیا۔اس کارروائی کے خلاف جمعیة علماءہند کے صدر مولانا ارشد مدنی نے اپنی ناراضگی کا اظہار کرتے ہوئے دہلی کے لیفٹیننٹ گورنر تیجندر کھنہ سے شام کو بات کی۔ اس کے علاوہ انہوںنے لیفٹیننٹ گورنر کوایک میمورنڈم بھی بھجوایاجو کل صبح ان تک پہنچ جائے گا۔ ایل جی سے ہوئی بات چیت کے بارے میں بتاتے ہوئے مولاناارشد مدنی نے بتایا کہ لوگوں نے وہاں اپنی جائدادیں خریدی اور تیس چالیس سالوں سے وہاں رہ رہے ہیں ۔ اس طرح وہاں بلڈوزر چلا کر انسانی حقو ق متاثر ہورہے ہیں۔ انہوںنے کہا کہ جیت پور کی زمین اگر سرکاری ہے تو اسے توڑ دیا جائے لیکن جس زمانے میں وہاںزمین خریدی گئی اس وقت وہاں کھیت تھے اورلوگوںنے یہ زمین خریدی ہیں۔ مولانا ارشد مدنی نے ایک میمورنڈم ایل جی کو بھجوایا ہے جو کل صبح انہیں مل جائے گا۔ اس کے جواب میں لیفٹیننٹ گورنر نے بھروسہ دلایا ہے کہ وہ اس پورے معاملہ پر غورکریں گے۔